أقول لمين حرام
أنا بزعل لما أشوفك واتاثر قوي يا رغيف
بقى حالك حال شوف شكلك بقى يغني عن التعريف
كنت ابيض منفوخ دايما كان طعمك حلو ظريف
لكن ادي حال الدنيا من بعد ربيع خريف
والله وبقيت محروق ومحجر وبقيت ذي الليف
جواك خيش ونشارة وسعات مسامير ودبارة
بقى بعد العز أشوفك كده حالك ألف خسارة
أمال راح فين دعمك وحشوفك امتى يا زين
منفوخ كدة ذي الأول ومربرب تملى العين
طمني وريح بالي علشان خاطر المساكين
اللي أنت أساس وجبتهم والله غلبان أنا والملايين
سوء حالك نشكيه لمين اوعي تقولي روح لبتوع التموين
والله وغلبت السوبر وعليك راح يبقى الدور
وبقينا بنكتب عنك ذي البيه الكستور
واللي بيجهل أحوالك يجي وينزل في الأقاليم
ويجرب خلع الضرس ويدوق رغيف المظاليم
للشاعر : محمود ابراهيم